Forvarnir og fræðsla

Barnaheill bjóða upp á námskeið og fyrirlestra þar sem hægt er að öðlast þekkingu og fræðslu og bæta verklag í forvörnum gegn ofbeldi á börnum. Við teljum að fræðsla og upplýst umræða sé besta forvörnin og stuðli að því að við sem samfélag verðum betur í stakk búin  til að takast á við og koma í veg fyrir óæskilega hegðun.

Einelti og kynferðisofbeldi gagnvart börnum er alvarlegt, alþjóðlegt vandamál og eru vitundarvakning, fræðsla og forvarnir afar mikilvæg tæki í baráttunni gegn því.

Útgáfa á fræðsluefni  er ríkur þáttur í starfsemi Barnaheilla . Þar ber hæst útgáfa efnisins Vinátta – Fri for mobberi sem ætlað er að sporna gegn einelti og er hugsað fyrir leikskóla og yngstu bekki grunnskóla. Einnig höfum við í samvinnu við fjórar Evrópuþjóðir unnið að því að þróa fræðslu og forvarnarefni um kynheilbrigði barna undir nafninu CSAPE (Child Sexual Abuse Prevention and Education). Markmiðið með þessu verkefni er að efla forvarnir gegn kynferðislegu ofbeldi á börnum með því að fræða börn, fullorðna og þá aðila sem vinna náið með börnum s.s. í skólakerfinu, íþróttum og frístundum.

Börn bera aldrei ábyrgð á því ofbeldi sem þau verða fyrir eða horfa upp á og það á aldrei að líðast.